Грчкиот вицепремиер и министер за надворешни работи Евангелос Венизелос утре ќе отпатува во САД, каде во недела во Њујорк ќе се сретне со генералниот сектретар на ОН Бан Ки Мун.
Една од главните теми во разговорот, јави дописникот на МИА, ќе биде прашањето за името на Македонија, а ќе се дискутира и за Кипар и ситуацијата на Блискиот Исток.
Посетата на Венизелос на САД завршува на 27 септември по неговото обраќање на 68. Генерално собраниена на Обединетите Нации.
Грчкиот премиер Андонис Самарас исто така ќе патува во Њујорк, но на 28 септември.
Грчкиот вицепремиер на 12 септември ја информираше Парламентарна комисија за национална одбрана и надворешна политика за неговата средба со медијаторот Метју Нимиц, при што информира дека следниот состанок во врска со прашањето за името најверојатно ќе се одржи последната седмица од септември во Њујорк. Тој и тогаш повтори дека Атина е за сложено име со географска одредница што се однесува на географскиот поим на името, а не на „политичкиот термин“, и оти е само за ерга омнес решение.
По посетата на Нимиц на Атина и Скопје, грчките медиуми напишаа дека медијаторот сака да ја искористи ситуацијата кога Венизелос и шефот на македонската дипломатија Никола Попоски во исто време ќе бидат во Њујорк кон крајот на септември, за да одржи уште една рунда состаноци.
Во официјалното соопштение од грчкото МНР за средбите на Венизелос се вели дека тој во Њујорк ќе одржи повеќе билатералани и мултилатерални средби.