Координацијата за предложената рамка на медијаторот на ОН во спорот за името Метју Нимиц ќе се одржи в сабота попладне во Клубот на пратеници. На средбата која е иницирана од МНР, ќе присуствуваат претседателот Ѓорге Иванов и лидерот на опозициската ВМРО-ДПМНЕ, Христијан Мицкоски.
Министерството за надворешни работи е иницијатор за одржување на координативен состанок, со цел да се информираат релевантните политички фактори во Република Македонија за предлогот на амбасадорот Метју Нимиц, кој произлезе од последната средба со македонскиот и грчкиот преговарач во Њујорк.
Портпаролот на Владата, Миле Бошњаковски на прес-конференција најави дека наскоро ќе се одржи средба за рамката на Нимиц на која ќе бидат присутни повеќе политички лидери. Според него, Владата веќе го започнала процесот на анализа и на координација околу најновата рамка на медијаторот и очекува да биде изграден широк национален консензус.