По повод Денот на независноста на Република Македонија, на 8 септември во Охрид по 28-ми пат ќе се одржи Охридскиот атлетски маратон, што традиционално се трча на патеката Свети Наум – Охрид во должина од 30 километри.
Според инфорамциите од организаторот на манифестацијата, стартот на трката е закажан за 9 часот од кај поранешната караула кај граничниот премин „Свети Наум“, додека првите маратонци на целта на градскиот кеј во Охрид се очекува да пристигнат некаде после 10:30 часот.
Независно од скромниот награден фонд, според бројот досега пријавени учесници се очекува оваа година да има двојно повеќе маратонци отколку лани.
Најавено е учество на квалитетни тркачи, меѓу кои и минатогодишниот победник Лајош Берец од Унгарија и рекордерката на патеката србинката Ана Суботиќ.
Охридскиот маратон започна да се организира од 1976 година и се одржуваше непрекинато 18 години се до 1993 година. После прекинот потворно се одржува секоја година од 2004 наваму, а поради големата заинтересираност од општински и републички Охридскиот маратон доби меѓународен карактер.