Речиси шест пати понизок од просекот за јануари е водостојот на реката Сатеска кај Ботун, а 3,5 пати е намалено нивото на Вардар кај Јегуновце, покажуваат податоците на Управата за хидрометеоролошки работи (УХМР).
Околу 2,5 пати понизок е и водостојот на Црна Река кај Новаци, а намалени се и нивоата на Вардар кај Скопје и Велес, Треска кај Македонски Брод и Брегалница кај Берово.
Водостојот на Вардар кај Демир Капија е ист со вообичаениот за овој месец, а Пчиња кај Катлановска Бања и Црн Дрим кај Ложани имаат повисок водостој од просечниот.
Нивоата на Охридското, Преспанското и Дојранското езеро се во рамките на јануарскиот просек.