Туристичките потенцијали и капацитети во Македонија беа претставени пред повеќе од 70 туроператори, туристички агенции и новинари во Бугарија, соопшти денеска Агенцијата за промоција и поддршка на туризмот на Македонија.
Според директорот на Агенцијата за промоција и поддршка на туризмот на Македонија Кристијан Џамбазовски, можностите за туристичка размена помеѓу двете држави се големи.
– Македонскиот туристички производ станува поконкурентен на светскиот пазар и се зголемува туристичкиот промет во државава. Следејќи ги светските трендови Владата на Република Македонија и Агенцијата за промоција и поддршка на туризмот преку проектите кои се во фаза на реализација и со нови предвидени проекти дејствуваме во создавање услови за унапредување на туристичкиот производ и значително збогатување на понудата и туристичките содржини, истакнал на презентацијата Џамбазовски.
Според статистичките податоци, лани бројот на странски туристи во Македонија се зголемил за 15 проценти. Бројот на бугарски туристи во 2013 година изнесува 21.000, а на ноќевањата 40.473.
– Во последните неколку години бројот на бугарски државјани кои дошле во Македонија е зголемен за 35 проценти. Бројот на ноќевања во 2013 година е зголемен за 15 проценти во споредба со последните неколку години. Овие бројки покажуваат дека соработката меѓу Македонија и Бугарија е на доста високо ниво, за што се надевам дека оваа тенденција на пораст ќе остане и во иднина, информирал на презентацијата Џамбазовски, кој истакнал дека медиумската кампања за македонските туристички потенцијали, што почна лани, продолжува и годинава.