Министерството за здравство информира дека во текот на денешниот ден на Клиниката за инфективни болести и фебрилни состојби во Скопје на коронавирус се тестирани тројца патници.
„Резултатите на тројцата патници се негативни на корона вирусот. Станува збор за македонски државјани од кои двајца допатувани од Италија и еден од Шпанија“, се вели во соопштението.
Денеска, претседателот на Владата Оливер Спасовски и министерот за здравство Венко Филипче го посетија граничниот премин Табановце, најфреквентен граничен премин каде доаѓаат патници од регионот на Северна Италија.
Филипче информираше дека сите припадници на МВР и Царинската управа одлично се справуваат со ситуацијата и дека целосно се почитува утврдениот алгоритам за контрола на патниците.
Спасовски и министерот Филипче упатија апел до сите оние кои патуваат или ќе допатуваат во нашата земја, точно да одговараат на прашалникот, бидејќи на тој начин го штитат сопственото и колективното здравје на граѓаните.