Обвинетиот Тони Трајковски не дојде на денешното судење за ТНТ, по што, судот ја одложи расправата за уривањето на објектот „Космос“ на бизнисменот Фијат Цановски.
„Добив известување дека по минатото рочиште бил на доктор и ви го поднесов. Добил документ да не присуствува на рочиште, поради неговата здравствена состојба”, рече адвокатот на Трајковски, Јовица Страшевски.
На рочиштето присуствува докторката Викторија Вујиќ, која ќе сведочи за здравствената состојба на Трајковски без присуство на новинарите.
На минатото рочиште, адвокатот на обвинетиот Тони Трајковски, Јовица Страшевски реагираше дека неговиот клиент е под терапија и не е во состојба да учествува на судските рочишта.
Обвинителот Бурим Рустеми, поради ваквите околности побара раздвојување на постапката за Тони Трајковски, а одбраната реагираше дека не може да се води постапка против поттикнувачи со раздвојување на постапката за обвинетиот извршител на делото.
Предметот го води судијата Огнен Ставрев, а застапник на обвинението е Бурим Рустеми од ОЈО Куманово.
Првото рочиште за судењето за ТНТ се одржа на 24. јануари 2018 година, но поради истекот на мандатот на еден од членовите на судечкиот совет процесот се врати од почеток.
За делото обвинети се повеќе лица меѓу кои екс министерот за транспорт и врски Миле Јанакиески и тогашниот градоначалник на општина Гази Баба Тони Трајковски, додека во отсуство му се суди на поранешниот премиер Никола Груевски.