Правосудните органи и органите на истрагата не ги расчистија дилемите поврзани за загинувањето на новинарот Никола Младенов, туку уште повеќе се продлабочија, стои во двомесечниот извештај за јули и август на „Транспарентност Македонија“.
Според нив, случајот Младенов уште од самиот почеток е проследен со контроверзи и нејаснотии, а институциите немаа логични одговори. Ви извештајот стои дека повиканите институции решиле на заедничка прес – конференција да го објават конечкиот заклучок – Никола Младенов загинал во сообраќајна несреќа која била предизвикана од самиот Младенов.
„Ако во првите денови по незгодата можеше да се прифати истражниот судија и другите истражни органи да немаат одговор на некои значајни прашања, крајно нелогично беше што истите тие дилеми не беа расчистени и по повеќе од три месеци од настанот.
– Да се закаже прес конференција, на која – на иста маса! – се појавуваат министерката за внатрешни работи, државниот јавен обвинител, јавниот обвинител на ОЈО Скопје и претседателот на Кривичниот суд и да не се одговори на прашањата за тоа каде бил Младенов во времето од 16 до 23 часот на кобниот 26 март годинава; со кого контактирал критичниот ден; каде е неговиот мобилен телефон; зошто не е извршено вештачење на автомобилот и сл. – е целосно неприфатливо.
– Јавноста беше сведок на неверојатни објаснувања дека сите камери на автопатот од Скопје кон и од Велес не работеле, дека истрагата не утврдила каде бил Младенов во споменатиот период и со кого контактирал, како и тоа дека неговиот мобилен телефон не е пронајден – се вели во извештајот.
Петар Клинчарски