Функционерите на ВМРО-ДПМНЕ да дојдат и да одговорат на прашањата на пратениците на надзорната расправа за поплавите што ги зафатија Скопје и околината, побара координаторот на пратеничката група на СДСМ, Горан Сугарески.
Како што кажа тој, пратениците од ВМРО-ДПМНЕ во петокот ја блокирале расправата цел ден за обвинетиот Никола Груевски и неговите кадри да избегаат од соочување со јавноста за поплавите.
– Раководните кадри на ВМРО-ДПМНЕ во институциите се одговорни за катастрофалните последици од поплавите кои однесоа најмалку 23 човечки жртви. Бебиња настрадаа, рече Сугаревски.
Тој потсети и на огромните материјални штети и последиците од поплавите, и кажа дека дел од семејствата го немаат добиено ниту авансот од 500 евра што го вети државата.