Никола Груевски, наместо утре, во среда треба да се појави во Кривичниот суд. Судењето за предметот „Титаник“ на СЈО ќе продолжи на 14 ноември, бидејќи претходно бил договорен тој датум. Судниците во новата зграда на Кривичен се зафатени со предметите за „27 април“ и „Монструм“.
Со ова пропаѓа можноста, доколку претходно не го најдат судските курири, утре да му го врачат конечното решение за издржување на двегодишната затворска казна.
Веќе во вторник, судот доколку заклучи дека Груевски го одбегнува извршувањето на казната, може да донесе одлука тој присилно да биде спроведен во Шутка. Доколку не успеат да го пронајдат, судот распишува потерница.
Екс премиерот и поранешен лидер на ВМРО-ДПМНЕ, за издржување на затворската казна за случајот „Тенк“ на СЈО, требаше да се пријави во петокот, но судските курири во неколку обиди не успеаја да го пронајдат во адресата на која е пријавено неговото живеалиште.
