Полициската станица од Струга поднесе кривична пријава против лицето 40-годишниот Д.У. поради постоење основи на сомнение за сторено казнено дело „неовластено производство и пуштање во промет на опојни дроги, психотропни супстанци и прекурсори.
Како што информира портпаролот на СВР Охрид Стефан Димоски, на 27-ми овој месец, пријавениот, на 43-годишниот Д.Д., наркозависник од Струга, му продал помала количина опојна дрога хероин. Нивната средба се случила на пресекот на улиците „Маршал Тито“ и „Арсеније Јовков“ во Струга, по претходен меѓусебен телефонски договор.
– На местото на средбата, пријавениот Д.У. пристигнал со неговото патничко моторно возило марка „Форд Мондео“ со струшки регистарски таблици, по што следела брза купопродажба на хероинот. Веднаш потоа, Д.Д. е пресретнат од полициските инспектори кој при тоа се обидел да го исфрли хероинот запакуван во црна најлонска фолија, вели Димоски.
При извршен претрес во домот и други простории кај пријавениот Д.У., во кујната, во фиока била пронајдена мала дигитална вага за мерење на мали количини со траги од прашкаста материја. Дополнително, на првиот кат во неговата спална соба над ормарот било забележано и едно мало пакување од црна најлон фолија со прашкаста материја идентично на пакувањето пронајдена претходно кај наркозависникот Д.Д.
Пронајдените предмети се одземени и предадени на вештачење во Министерството за внатрешни работи.
Пријавениот Д.У. е лице познат на службата против кого и досега, по слични основи биле поднесувани кривични пријави.