Изградбата на стариот струмичкиот театар ќе се реализира според предвидениот временски период. Градежните работи почнуваат. Средствата се обезбедени, така што Струмица ќе добие еден прекрасен културен објект и ќе се врати сјајот на Струмица и на културата во градот.
Ова го истакна носителот на листата на ВМРО-ДПМНЕ во 4 Изборна единица Зоран Ставреки при посетата на локацијата каде ќе се гради Театарот, заедно со министерката за култура Елизабета Канческа-Милевска.
– Во следниот период ова ќе биде вистинско градилиште и тука ќе никне стариот струмички театар, душата на градот. Струмица ќе ја вратиме во делот на културата. Да биде гордост за сите струмичани кои сакаат да одат во театар и да имаат едно прекрасно катче каде ќе можат да следат театарски претстави. Театарските работници за да можат да го извршуваат она што најдобро знаат – театарските претстави ќе добијат една достојна средина, изјави Ставрески.
Тој додаде дека е посебно задоволство што и во вакви тешки времиња со министерката за култура во Буџетот се обезбедени 220 милиони денари за реализација на овој проект.
Министерката за култура истакна дека ќе се оди со една забрзана динамика и оти активностите на терен се почнати, се расчистуваат сите остатоци и елементи што се наоѓаат на самиот театар, кој е опожарен во 2001 година.
– Ветивме дека ќе го изградиме струмичкиот театар и навистина тоа се остварува. Поддршката од министерот за финансии е од огромна важност за културата, за културните работници, бидејќи без таа поддршка сето она што ни е во план, во програма не можеме да го ветиме, рече Канческа-Милевска и додаде дека ретко може да се види еден министер за финансии да дава огромна поддршка за нешто што, како што рече, значи наша највисока вредност, а тоа е културата.
Информира дека стручните служби изработија еден многу значаен проект во сите делови и фази на градбата на театарот при што се водело сметка и во делот на сценската технологија, на сценската кула на срцето на театарот за самите актери.
Во театарот, како што додаде, ќе се врати отсликувањето на познатиот уметник Цане Јанкуловски и таа прекрасна орнаментика да биде запазена во самата реконструкција.
Според неа, оваа Влада како никогаш досега инвестира во културата, во уметноста, во културното наследство, во сето она што е најголема наша вредност.
– Ние како држава имаме со што да се пофалиме, имаме со што да се гордееме, така што таа поддршка во делот на уметноста, во делот на почитувањето на културните, уметничките и историските вредности ќе продолжи и во наредниот период, истакна Канческа-Милевска.