Состојбата со акумулациите од хидросистемот „Брегалница“ е стабилна, а се преземаат мерки да се спречи излевањето на водата од речните корита.
Во моментот во браната Калиманци се акумулирани 98 милиони метри кубни вода, а просечниот доток од реката Брегалница е 28 метри кубни во секунда. Поради најавите за нови врнежи од дожд и топењето на снегот, превентивно се испуштаат по околу 12 милиони метри кубни, за да може да се амортизира зголемениот доток.
Во акумулацијата Мавровица има 2,3 милиони метри кубни, додека Гратче е полна и се прелеваат по околу два метри кубни вода во секунда.
Се расчистуваат и речните корита и каналската мрежа од страна на екипи на водостопанската подружница „Брегалница“ од Кочани.
– Ангажирани се три машини за ископ на каналите за наводнување и одводнување и досега работата е завршена со околу 50 отсто од планираното. Истовремено, работиме на зајакнување на речните брегови, особено на реката Масалница, каде дојде до попуштање и излевање на водата, но за среќа поплавени се мали земјоделски површини, истакна директорот на водостопанската подружница „Брегалница“, Дени Митров.
Целосно е санирана состојбата со Зрновска Река која на почетокот на февруари се излеа и поплави овоштарници и ниви, а се работи и на чистење на коритото на Градечка Река. Земјоделците се задоволни од брзата реакција на вработените во водостопанската подружница.