Со усвојувањето на амандманот на ВМРО-ДПМНЕ и на ДУИ за проширување на ингеренциите на Агенцијата за медиуми, за набљудување на работата и на печатените и интернет медиумите, конечно е разоткриена вистинската намера на инсистирањето за носењето на медиумските закони, констатира Сојузот на синдикатите на новинарите на Македонија.
„Тоа не се барање од Европската унија, како што впрочем и соопшти делегацијата на ЕК во Македонија, ниту се обид да се адресираат клучните прашања во медиумската сфера – рекламирањето како алатка за корупција и гушењето на слободата на изразувањето во редакциите. Овие прашања воопшто ги нема во предложената легислатива! Овој закон е проект за ставање под контрола и на печатените и на интернет-медиумите, како и дисциплинирање на електронските медиуми со казни, за да не мораат да се поткупуваат со реклами“, образложи ССНМ во вчерашното соопштение.
Според синдикатот, конечно се покажало дека јавните дебати и расправи, експертизите од ОБСЕ и Советот на Европа, биле со цел да се одглуми транспарентност и инклузивност на еден “малициозен процес за ставање под контрола или озаконување на веќе постојната контрола врз јавниот збор и јавното мислење“.