Автобус од Србија, кој превезувал руски туристи е каменуван ноќеска во строгиот центар на Скопје. Кон автобусот било фрлено со цигла, а пријавата во полиција стигнала утринава од страна на возачот. Во моментот кога се случил настанот, тој бил паркиран во близина на хотелот „Холидеј Ин“. Од МВР велат дека е извршен увид.
„Во 09.10 часот во полициската станица Центар, С.К.(47) од Република Србија пријавил дека во периодот од 19.20 часот на 25.06.2021 до 07.30 часот на 26.06.2021 непознат сторител со тврд предмет извршил оштетување на возачко стакло на автобус со српски национални ознаки, сопственост на превозно претпријатие од Бачка Паланка, Србија. Автобусот го паркирал пријавителот на паркинг простор на улица ‘Филип Втори Македонски’“, велат од МВР за „А1он“.
Според пријавеното, освен оштетување на стаклото, сторителот не одзел ништо од автобусот. Полицијата работи на пронаоѓање на лицата кои го каменувале автобусот.