Вицепремиерот за европски прашања Арбр Адеми денеска оствари редовна работна средба со евроамбасадорот Самуел Жбогар, на која било дискутирано за повеќе теми од европската агенда на Македонија.
На средбата вицепремиерот Адеми, како што се наведува во соопштението од неговиот кабинет, накусо се осврнал на политичката состојба во Македонија и ги поздравил досегашните напори на Унијата за изнаоѓање излез од кризата.
Неодамнешните посети на високи функционери на ЕУ се доказ на заложбата и поддршката од страна на Европската унија за Македонија и нејзината eвро-атланска ориентација, се вели во соопштението.
Адеми, исто така, нагласил дека е важно, и во услови на продолжена внатрешна криза, да продолжат редовните активности поврзани со имплементацијата на Спогодбата за стабилизација и асоцијација и реализација на проектите од ИПА програмата.
Вицепремиерот уште еднаш истакнал дека Република Македонија останува на стратешката определба за членство во Европската унија, бидејќи тоа е желба и интерес на сите граѓани, додавајќи дека обврска на политичките раководства е да работат на остварување на тие стратешки приоритети и да ја следат волјата на мнозинството граѓани, стои во соопштението од кабинетот на Адеми.
Двајцата соговорници, се додава, се договориле дека ваквите редовни работни средби треба да продолжат, во функција на координација на реформските активности поврзани со нашето идно членство во Европската унија.