Претседателот на Демократската унија за интеграција Али Ахмети денеска во Тетово се сретна со амбасадорите на Финска и Шведска, Тимо Рајанкагнас и Матс Стафансон и со Аса Пехрсон, претставник на Шведска во Брисел.
На средбата, како што соопшти партијата, е разговарано за последните случувања во Македонија во врска со прислушувањето, меѓуетничките односи, спорот со името и евроатлантската интеграција на државата.
Ахмети истакнал дека случајот со прислушувањето не смее да ја попречи евроатлантската агенда на Македонија и оти политичките партии треба заеднички да се ангажираат за иднината на земјата.
– Брисел треба да се вклучи директно во управувањето со сложената ситуација во земјата преку ангажирање на еден тим кој ќе го следи политичкиот дијалог меѓу политичките партии како и управувањето со процесот на разјаснување на афера со прислушувањето, се вели во соопштението.
Ахмети посочил дека главниот проблем на Македонија е спорот за името бидејќи според него блокирањето на евроатланската иднина создава тензии во меѓуетничките односи. Тој ги поканил Брисел и Вашингтон директно да се вклучат во надминувањето на спорот преку овозможување на непосреден дијалог меѓу македонскиот и грчкиот премиер.
Амбасадорите се интересирале за меѓуетничките односи и спроведувањето на Охридскиот договор.