Делегација на Централната изборна комисија на Косово, кои ќе ги следат претседателските и предвремените парламентарни избори во Македонија денеска ја посети Државната изборна комисија на Република Македонија.
– Разменивме мислења и споделивме искуствата за изборните правила во Македонија, како и во регионот. Централната изборна комисија на Косово не информира за реформите во нивните изборни правила, изјави по средбата Субхи Јакупи, член на Државната изборна комисија.
Тој информира дека претседателката и шест члена на Централната изборна комисија на Косово и техничкиот персонал имаат право да набљудуваат во сите избирачки места и во сите Општински изборни комисии. Тие со себе ќе имаат материјал за помош при набљудувањето и беџови, издадени од ДИК.
Претседателката на Централната изборна комисија на Косово Валдете Дака истакна дека се информирале за целокупната организација за утрешните избори во Македонија.
Таа изрази надеж дека ќе имаат добри искуства кои ќе ги пренесат во нивната држава и оти во Македонија ќе се спроведат фер и демократски избори.
На новинарско прашање за гласањето на дијаспората, Јакупи рече дека сите избирачки места се отворени на време.
– Повеќе избирачи имаме пријавено во Берн, Венеција и Виена, каде добро се одвива гласањето, рече Јакупи.