Техничкиот премиер Оливер Спасовски вели дека единствениот правен механизам за одложување на изборите поради коронавирусот била донесената Уредба со која активностите за изборите треба да продолжат во моментот кога ќе биде укината вонредната состојба. Изборите беа распишани и 12 април одреден за нивно одржување, а Собранието распуштено кога поради коронавирусот лидерите на политичките партии се согласија да бидат одолжени.
„ Што се однесува до Уредбата, или правниот механизам, таа е сосема јасна. Ние немавме друга правна можност за одложување на изборите освен преку таа Уредба да се стават во мирување сите изборни рокови. Тоа значи дека во моментот кога престанува вонредната состојба продолжуваат да течат роковите за изборните дејствија“, рече премиерот Спасовски.
За изборите денес се разговараше и на лидерската средба во кабинетот на претседателот Стево Пендаровски. Премиерот Спасовски рече дека на средбата биле понудени и конкретни датуми во однос на одржувањето на изборите , но на политичко ниво било одлучено разговорите да продолжат следната недела, а во меѓувреме да се обезбедат дополнителни информации.
Меѓу дополнителните информации е и протоколот кој Комисијата за заразни болести треба да го подготви и препорача за начинот на кој ќе се изведе изборната кампања, какви собири ќе бидат забранети, а какви дозволени.
