„За жал пратениците на ВМРО-ДПМНЕ не гласаа за формирање на Анкетната комисија за трагедијата во Кочани, којашто ја поднесе пратеничката група на Социјалдемократскиот сојуз заедно со пратеничката група на Левица и беше поддржана од Европскиот фронт. Владејачкото мнозинство не покажа ниту емпатија, ниту разбирање, ниту елементарно чувство за барањата на семејствата, на загинатите во оваа трагедија и на сите коишто се повредени“ рече денеска на прес-конференција Оливер Спасовски – координатор на ПГ на СДСМ.
Рече дека „очигледно ова е партиска директива. Затоа што повторно се врати времето во кое што имаме протест и контра протест, пленум и контра пленум“.
„Ова претставува уште едно понижување, разочарување на семејствата коишто изгубија најмногу и коишто не можат ништо да надоместат со било каква дебата и од било кого. Родителите и семејствата чекаат барем трошка надеж, барем трошка вистина, барем малку човечност и барем еден знак дека институциите се на нивна страна. Ова е срам за оваа институција, парламент за законодавна власт којашто треба да биде за сите граѓани и треба да работи за сите граѓани. Денеска пропуштивме една огромна шанса во којашто треба да покажеме единство и солидарност“ рече Спасовски.