Соработката на Управата за јавни приходи на Македонија и на Даночната управа на Србија ќе продолжи преку размена на искуства и позитивни практики и заедничка работа во имплементирање на даночните политики, истакнале на денешната средба во Белград директорките на даночните институции на Македонија и на Србија Анастасија Илиеска и Драгана Марковиќ.
На средбата, како што соопшти УЈП, е истакнато дека соработката помеѓу даночните администрации треба да биде поставена во преден план.
Се разговарало за тековните активности кои ги имплементираат двете даночни управи, зацртаните стратешки цели и процесот на модернизација на даночната администрација, со акцент на проектите во фаза на реализација, како и за конкретните чекори кои ги преземаат даночните институции во делот на ефикасност и афирмација на услугите насочени кон даночните обврзници.
– Добро поставен даночен систем е клучен фактор во нормалното функционирање на државниот апарат, нема стабилна држава без добро уредена даночна политика, навела на средбата Илиеска, која ја истакнала и определбата во борбата против сивата економија, како и посветеноста на УЈП во надградувањето на модерен и ефикасен пристап кон даночните обврзници и градење повисок степен на доверба од граѓаните, преку едукативно и превентивното делување со цел доброволно плаќање на даноците.
Директорката Илиеска ја потенцирала стратешката определба и развојните политики на УЈП и јасниот концепт за подеднаков третман кон сите даночни обврзници, целосната посветеност на програмските цели и унапредување на ефикасноста на работните процеси, се вели во соопштението.