Министерката за одбрана Радмила Шекеринска со претставници од Сојузот на борците од Народноослободителната и Антифашистичка војна на Македонија денеска потпишаа договор со кој на Сојузот му се доделуваат на користење простории во Домот на Армијата на Република Македонија за период од 10 години.
– На овој начин се обидуваме да исправиме една долготрајна неправда во оваа држава во која оние кои ја изборија и ја издејствуваа со крв, пот и многу мака слободата на нашата држава беа оставени на улица, рече министерката.
Затоа, додаде таа, Владата донела одлука за обезбедување на овие простории за во иднина врската меѓу државните институции и органи и Сојузот на борци уште повеќе да зајакнува.
– Нашата цел е новите генерации на сите оние кои крвареле, се бореле и жртвувале за Македонија, да им покажат дека нивната жртва не е залудна, рече министерката Шекеринска.
Претседателот на Сојузот Никола Стојановски истакна дека е задоволен од одлуката да им се излезе во пресрет на нивните барања да добијат простории во кои ќе можат да ја развиваат нивната работа и да продолжат тоа што го работеле за време и по војната за изградбата на државата.