Од незаконски прислушуваните разговори, кои денеска се пуштаат во судот на рочиштето за предметот „Титаник“ направени на 7 април, денот од вториот круг на локалните избори во 2013 година, може да се слушне како поранешниот министер за транспорт и врски, Миле Јанакиески врши контрола на излезноста на лицата вработени во државните институции и приватните фирми кои соработувале со тогашната власт.
– СГС, Музеј на Град Скопје, основни, средни училишта од сегде има списоци. „Паркови и зеленило“ е најслабо, таму маваме повеќе, му реферира соговорничка на поранешниот министер Јанакиески.
Јанакиески во еден од разговорите вели дека од фирмата на Орце Камчев, „Орка Холдинг“ не се излезени да гласаат и дека од базата точно знае кој излегол на гласање, а кој не.
Во голем дел од разговорите Јанакиески со име и со презиме ги спомнува лицата кои немаат излезено на гласање со цел истите да бидат, како што вели „притиснати“, да гласаат. Ова особено се однесува на регионот во општина Центар.
– Многу од Дебар маало немаат излезено, види за семејство Андонови и другите таму, му вели Јанакиески на еден од соговорниците.
Виктор Јованов