Скромен дочек ќе биде организиран во Охрид за Нова година. Ова го потврдија од локалната самоуправа. Од таму најавија дека охриѓани и туристите на градскиот плоштад ќе ги забавуваат пејачи и групи од Охрид, а за прославата на плоштадот и за украсувањето на градот ќе бидат потрошени околу 10.000 евра.
„Украсувањето на градовите стана мода. Се трошат стотина илјади евра за украсување,осветлување и изнајмување на опремата наместо тие пари да се трошат за други намени. Ние нема да се натпреваруваме со никој колку пари ќе потрошиме, бидејки тие пари треба да се трошат домаќински. Во Охрид и оваа година ќе има убав иако скромен дочек на Нова година. Со малку пари ќе направиме добра забава„ рече градоначалникот на Охрид, Александар Петрески
Украсувањето на градот кое веќе е во тек ќе се реализира со старите и веќе постоечки украси, а биле набавени и нови рекоа од општината. Иако Охрид е најголем туристички центар во Македонија каде и хотелиерите и останатите туристички работници очекуваат многу домашни и странски гости да престојуваат во градот за новодогишните празници, градските власти сепак се одлучија дочекот да го направат со помалку пари, за разлика од соседните туристички центри кои редовно организираат големи забави под отворено небо, со цел да се привлечат што повеќе туристи.