Во подружницата на Јавното претпријатие „Македонски шуми“ Шар-Гостивар, од почеткот на годината склучени се педесетина договори за набавка и испорака на огревно дрво. Најмногу од заинтересираните граѓани ја користат можноста за плаќање на рати.
– Од објавувањето на огласот секојдневно се склучуваат по четири до пет договори, а во наредниот период очекуваме и зголемување на интересот кај граѓаните. Крајниот рок за поднесување на барања и склучување на договори е З март и до тој датум цената ќе биде загарантирана. Тоа значи дека за еден кубик буково дрво ќе се плаќа по 2.370 денари и 2.450 денари за даб”, вели Форе Милошевски раководител на подружницата „Шар-Гостивар“.
Според него граѓаните имаат можност да го отплаќаат огревното дрво на шест еднакви рати, а првата рата се плаќа со склучување на договорот. Превозот се плаќа дополнително.
Граѓаните од социјално ранливите категории можат да користат и некои предвидени поволности. За нив е предвидено, огревното дрво да го плаќаат на повеќе рати, а добиваат и 10 проценти попуст, доколку ја платат целата сума одеднаш.
Минатата година, гостиварската подружница на ЈП „Македонски шуми“ испорача и продаде 12.500 метри кубни огревно дрво.