Специјалното јавно обвинителство е подготвено веднаш да ги предаде сите предмети, списи и докази до Јавното обвинителство, се вели во денешниот допис на СЈО.
„Ја известуваме јавноста дека од страна на Јавното обвинителство на Република Северна Македонија доставен е допис во кој е наведено дека согласно член 6, став 5 од Законот за
Јавното обвинителство за гонење на кривични дела поврзани и кои произлегуваат од содржината на незаконското следење на комуникациите , неопходно е ова Обвинителството да преземе дејствија за предавање на предметите во Јавното обвинителство на Република Северна Македонија. Постапувајќи по дописот, до Јавното обвинителство на Република Северна Македонија доставено е известување дека Јавното обвинителство за гонење на кривични дела поврзани и кои произлегуваат од содржината на незаконското следење на комуникациите е подготвено веднаш да ги предаде предметите по кои постапува со сите списи и докази“, се вели во соопштението на СЈО.
Оттаму велат дека за останатите детали околу примопредавањето ќе известат дополнително.
Во соопштението не е наведено дали до ЈО ќе бидат предадени и аудио-снимките, односно прислушуваните материјали, бидејќи тие се во надлежност единствено на СЈО.
Минатата недела шефицата на СЈО Катица Јанева која е во притвор за случајот „Рекет“ побара Јавното обвинителство со кое раководи Љубомир Јовески да ги преземе сите предмети, истраги и предистражни постапки.
Во меѓувреме, власта и опозицијата не постигнаа договор за Законот за јавно обвинителство со кое требаше да се регулира статусот на Специјалното јавно обвинителство.