Специјаланото јавно обвинителство каде што шефица е се уште Катица Јанева, по два часа, негира дека обвинителката наредила бришење на податоци од сите компјутери.
„Во врска со денешно објавените написи околу наводно издавање наредби за форензичко бришење или уништување на податоци во Специјалното јавно обвинителство, истите во целост ги демантираме. Појаснуваме дека Специјалниот јавен обвинител нема дадено наредба за било какво уништување на материјали, податоци или доказен материјал во рамките на обвинителството, било истиот да е во пишана или усна форма.
Сите активности кои во континуитет се преземаат се единствено во насока на зачувување на сите податоци, информации, документи и списи кои се предмет на работењето на ова обвинителството. Водејќи се од правилата за обезбедување на безбедносни, технички и организациски мерки во делот на заштитата на целокупниот материјал кој се наоѓа во обвинителството, сочувувањето на неговиот интегритетот е од висок приоритет, и во ниту еден случај не би се дозволило по било кој основ истиот да биде доведен во опасност“, се вели во демантот од Специјалното јавно обвинителство.
Како што велат во демантот, од компјутерите во СЈО засега ништо не е избришано.
Информацијата за форензичкото бришење на податоци од компјутерите прв ја објави порталот „360 степени“, а истата за „А1он“ ја потврдија вработени во СЈО.