Штип и денеска е втора општина по бројот на новозаразени со коронавирусот на здравствениот билтен. Потврдени се 29 нови случаи, со што бројката на активни во градот на текстилната индустрија се искачи на 409. Епидемиолозите не очекуваат наредните денови да се намалува бројката, бидејќи денеска имале голема гужва на пунктот.
-Нашиот тим само денеска зема вкупно 100 брисеви, дел се нови, но имаме и контролни. Се земаат брисеви од суспектни случаи, на пример ако жената е болна се појавуваат симптоми кај сопругот и го тестираме. Најголем дел од случаите денеска се со упат преку матичен лекар, вели Марија Димитрова, директор на Центарот за јавно здравје во Штип.
Во штипскиот регион денеска нема регистрирани оздравени пациенти од Ковид-19. Епидемиолозите бараат од граѓаните да ги почитуваат мерките, кои во основа се само три правила кои ќе помогнат да не се шири вирусот, а тоа се: носењето маски, држењето физичка дистанца и честото миење на рацете.