Невремето проследено со пороен дожд и град, кое кон крајот на јуни, најмногу го погоди атарот на гевгелиското село Ново Конско, предизвикало штети од 1,9 милиони денари, констатира Општинската комисија за проценка на штети кое доби зелено светло од Советот на општина Гевгелија.
Според Елаборатот изготвен од Комисијата, на површина од околу 7 хектари, оштетени се насади со различни земјоделски култури на 18 физички лица, меѓу кои најголеми штети претрпеле лозовите насади чиј што род годинава е преполовен.
Елаборатот е изработен согласно Законот за заштита и спасување и единствената методологија за процена на штети од елементарни непогоди. Во следна фаза ќе го разгледуваат Републичката комисија за проценка на штети и Владата на Република Македонија, а ќе биде доставен и до Републичкиот завод за статистика.