Опозициската СДСМ во реакција на денеска објавените нови законски измени во Владата побара преполовување на казните од кои на годишно ниво, како што тврди партијата, се наплаќаат по две милијарди денари.
Според портпаролот на СДСМ Петре Шилегов, Владата се пофалила со забрзување на постапките за изрекување глоба, наместо да се откажа од огромните казни.
– За 7 години Владата на име глоба извлече од граѓаните осум милијарди денари. Законските измените што беа објавени се само козметичкото шминкање на политиките на власта, рече на прес-конференција Шилегов.
Тоа што Владата објавува дека за социјалните случаи паричната казна ќе биде заменета со општокорисна работа, наведе портпаролот на СДСМ, е само замајување на јавноста, бидејќи казните и досега не можеа да бидат присилно наплатени кај оваа категорија граѓани.