Сами Љута вечерва прв излезе од Истражниот затвор „Скопје“, од четворицата обвинети во петкратното убиство кај Смилковско Езеро, откако Врховниот суд денеска ја укина пресудата и го врати предметот на повторно судење во кривичен суд. Пред вратата на затворот во Шуто Оризари го пречекаа роднините и пријателите.
По него од затворот во „Идризово“ излегоа и Агим Исмаиловиќ, Фејзи Азири и Хаки Азири.
Врховниот суд денеска донесе решение со кое обвинетите во случајот „Монструм“, кои беа осудени на доживотни затворски казни, се пуштени да се бранат на слобода.
На обвинетите Агим Исмаиловиќ, Фејзи Азири, Хаки Азири и Сами Љута им се определени други мерки за претпазливост, односно забрана за напуштање на живеалиште, односно престојувалиште, како и двапати неделно јавување пред Основниот суд Скопје 1.