Седуммина вработени од крајот на месецов остануваат на улица и од велешката телевизија К1, а откази се спремаат за уште неколку вработени, велат за А1он вработени од телевизијата.
Изворот за А1он истакнува дека отказите кои деновиве се делат како во нивната, така и во повеќе провладини медиуми се должи на слабата финансиска состојба во медиумите откако секнаа владините реклами.
– Нема повеќе пари од владата, а друг извор на финансии речиси и да нема, вели изворот за А1он.
ТВ К1 е всушност кавадаречката РТК која пред повеќе од една година се ребрендираше откако нејзин сопственик стана главниот и одговорен уредник на порталот Курир, Саше Стојановски.
Како што пред една година објави БИРН, телевизија К1 како тазе ребрендиран медиум склучила договор со Општина Велес да ги пренесува седниците, а сопственикот на велешката ТВ Здравкин, која до тогаш ги пренесувала седниците обвини дека телевизијата нема опрема за снимање и пренос, но и дека договорот е склучен без јавна набавка, во четири очи.
Освен К1, откази се делат и во новата телевизија Нова, а неофицијално, отпуштања ќе има и во повеќето ребрендирани телевизии, за кои се смета дека се блиски до власта, а причината која сите ја наведуваат е секнувањето на владините реклами.
Александар Тодески