Што и да кажам после ова што денеска го чувме е залудно. Но едно знам. Знам дека сите ќе платите и ќе одговарате за целото зло што сте го направиле. Во тоа сум повеќе од сигурен, напиша Сефер Цаноски на својот Фејсбук профил по објавувањето на нови снимки од страна на СДСМ, а според кои Никола Груевски и Миле Јанакиески правеле сплетки околу објектот „Космос“ на неговиот татко, Фијат Цаноски.
„Да, вистината е навистина како шило и излезе на виделина и уште еднаш јавно, ќе му заблагодарам на Зоран Заев, за мене еден од најчесните и најискрени политичари на денешницата во Република Македонија и пошироко. Време е за чесни и искрени луѓе во политиката, во бизнисот, во нашава скромна држава во секој поглед. Кога оние кои вработуваат, хранат стотици фамилии ги рушите и уживате во сето тоа, тогаш тоа е повеќе од доволно да сфатиме дека вие сте на погрешна позиција во погрешно време.
Господ да ни е на помош на сите кои живееме и си ја сакаме оваа наша Македонија со ваква власт и луѓе кои наместо да бидат пример со нивното однесување штетат на младо и на старо. На генерации кои ова го слушаат како едниствен, уникатен и негативен пример во историјата од нашето постоење…
Покојниот Борис Трајковски нашиот личен пријател велеше: Господ да ја благослови Македонија. Дај боже претседателе да ја благослови оти црно ни е пишано“, напиша Цаноски на Фејсбук.
