Пет собраниски комисии денеска ќе одржат седници на кои ќе разгледаат повеќе економски и политички предлог закони.
Единствена точка на дневниот ред на Комисијата за економски прашања е Предлог-законот за изменување и дополнување на Законот за енергетика, по скратена постапка – второ читање, поднесен од пратениците Хари Локвенец и Реџаиљ Исмаили.
Комисијата за финансирање и буџет ќе одржи две последователни седници. На првата ќе има јавна расправа по Предлог-законот за вршење на сметководствени работи, а на дневниот ред на втората се предлог законите за изменување и дополнување на Законот за супервизија на осигурување, и на Законот за банките, двата по скратена постапка – второ читање и поднесени од пратениците Агим Муртезанов, Мира Стојчевска, Милева Ѓоргиева, Панче Иванов и Артан Груби.
Комисијата за европски прашања ќе го разгледа Предлог-законот за спречување и заштита од дискриминација, по скратена постапка – второ читање, а Комисијата за одбрана и безбедност Предлог-законот за изменување на Законот за безбедност на сообраќајот на патиштата, по скратена постапка – второ читање.
На дневниот ред на Законодавно-правната комисија се пет законски решенија по скратена постапка поднесени од пратеници од владејачкото мнозинство.