По примерот на Србија, на социјалните мрежи и во земјава почна иницијатива за откажување на новогодишните прослави по плоштадите во Македонија, а парите наменети за изведувачите и целата организација да се пренаменат за лечење на болни деца.
Коментарите на социјалните мрежи во врска со оваа иницијатива во главно се позитивни и за дел од граѓаните ова е добра идеја, но има и такви кои се скептици и сметаат дека новогодишните прослави на плоштадите се само настани на кои градоначалниците профитираат и нема да се откажат со разни изговори.
Градоначалникот Коце Трајановски изјави дека за дочекот на Новата година од буџетот на градот се издвоени вкупно 5 милиони денари од кои 3 милиони денари за организија на Новогодишниот базар и дополнителни 2 милиони денари за самиот дочек на Новата година.
Ваквата иницијатива почна во Србија, каде неколку градови веќе ја откажаа прославата, односно градоначалниците и градските управи ја поддржаа оваа иницијатива и ги откажаа новогодишните спектакли.
Последни во низата се жителите на Стари Град во Белград чиј градоначалник ја прифати иницијативата и преку Твитер ги извести сите дека ја откажува прославата за Нова Година, а парите ќе одат за лекување на болни деца како и за сиромашните.