Каналите за истекување на вишокот вода од хидроакумулацијата „Турија“ и коритото на реката интензивно се чистат од АД Водостопанство на Македонија-Подружница „Струмичко Поле“.
Според директорот на „Струмичко Поле“, Лазар Ѓоргиев од обилните врнежи на снег и дожд во наредните денови се очекува браната „Турија“ да прелие и затоа коритото од истоимената река се чисти.
– Го чистиме коритото кај мостот меѓу селата Сарај и Просениково. Овој потег досега беше неисчистен и затоа веднаш таму интервениравме за да нема проблеми кога ќе бидеме принудени да го испуштаме вишокот вода, вели Ѓоргиев.
Инаку, нивото на водата на браната „Турија“ е во постојан пораст и веќе во наредните денови се очекува да го достигне максималното ниво од 50 милиони кубни метри вода.
Покрај „Турија“ и останатите акумулации во Струмичко се полни, а од помалите веќе се испушта вишокот вода.