Се работи на нова проектна документација за санација на свлечиштата, кои се во клисурата на магистралниот пат Кочани-Македонска Каменица, најави денеска министерот за транспорт и врски, Благој Бочварски при увидот во градежните работи на реконструкцијата на булеварот „Партизанска“ и изградба на нов водовод за штипската населба „Македонка“.
-Работиме на темелно решавање на проблемите и верувам дека наскоро ќе имаме и проектна документација и ќе се вметне во Програмите на ЈП за државни патишта, за реконструкција, односно санација на целата оваа карпа, од којашто постојано се случуваат одрони, рече Бочварски во одговор на новинарско прашање.
Прашан дали ќе се работи и на ново патно решение меѓу Кочани и Делчево, преку Калиманско поле, Бочварски истакна дека овој стар патен правец не е во Програмите на ЈП за државни патишта, бидејќи пред три години е извршена темелна реконструкција на постојниот патен правец од виничкото село Истибања преку Македонска Каменица до Делчево и до граничниот премин.