Интензивно се работи на реализацијата на проектот со кој ќе се обезбеди комплетна инфраструктура на просторот на поранешната касарна во Битола. Денес, асфалтирањето започна од улицата СРУ 7 во АРМ 1, а со завршувањето на комплетната инфраструктура на улиците во АРМ 1 и АРМ 2, станбените и индивидуалните објекти, ќе се поврзат со улиците од градското подрачје. Со тоа локалната самоуправа ќе го реши долгогодишниот проблем на инвеститорите од овој дел на градот, кои и покрај платените средства за комунални услуги, немаа можност да добијат соодветно инфраструктурно поврзување, а последиците од тоа ги трпеа и жителите на станбените објекти од оваа, нова населба во Битола, велат од Општината.
„Со договорот за кредитот за комплетна изградба на инфраструктурата во поранешната касарна и анексот на договорот, се обезбедува водоводна мрежа, атмосферска и фекална канализација, улично осветлување и асфалтирање на улиците, со што овој урбан дел ќе ја добие потребната инфраструктура, која за истиот е од витално значење.
Вкупната вредност на инвестицијата изнесува 155.000.000,00 денари, за реализација на комплетна инфраструктура на 14 улици во АРМ 1 и АРМ 2, а истите ќе бидат завршени оваа градежна сезона“, се вели во соопштението на Општина Битола.
