Непазарен и неекономски е потегот на Владата со кој општините и Јавното сообраќајно претпријатие Скопје минатата недела добија нафта од државните резерви, оцени денеска СДСМ.
Партијата бара власта да каже колкав процент од државните резерви нафта и нафтени деривати ќе се потрошат и дали со тоа не се доведува во опасност нивото кое мора да постои во случај на некоја кризна ситуација, дали нафтата е дадена како позајмица или оние кој ја добиле ќе ја вратат и кога, како ќе се надополнат дадените резерви и кога ќе им бидат префрлени на општините доволно пари за да го вратат долгот кон приватните превозници и кон фирмите на кои им должат за нафта за греење.
– Државните резерви нафта се наменети за итни и кризни ситуации и треба да служат во случај на елементарна непогода, војна или нафтена криза. Користејќи ги последните измени на Законот за задолжителни резеви на нафта и нафтени деривати, власта сега ги злоупотребува државните резерви и ги користи за покривање на недомаќинското и неодговорно работење на нејзините министри, градоначалници и директори, рече на прес-конференција Марјанчо Николов, пратеник од СДСМ и претседател на собраниската Комисија за финансирање и буџет.
Според СДСМ, наместо да посегнува по државните резерви, Владата треба да побара одговорност од менаџментот на ЈСП зашто претпријатието добива високи субвенции од градот Скопје, а остварува загуби.
