Требаше СДСМ да излезе на прес конференција со сознанија за пропусти и прикривање на случајот со грозоморното убиство од професионалниот војник, за Јолевски и Министерството за одбрана да соопштат дека го затвориле случајот и се амнестирале од одговорност и себе и надлежни служби и органи.
За Јолевски и Министерството за одбрана нема ништо спорно во тоа што во 05.27 минути било уредно пријавено напуштањето на стражарското место од страна на војникот со службеното оружје, а никој не го барал до 07.00 часот.
Нормално било што војникот бил контактиран по мобилен телефон во 06.06 минути, па во 06.39 минути, кој ветувал дека ќе се врати и му се верувало на зборот, иако никој не знаел каде е, а при тоа тој самиот одбивал да каже.
Нормално било што после отсуство од час и половина, самиот војник јавил дека убил тројца, и тоа во Злетово!
И после сето ова Јолевски и Министерството за одбрана утврдиле дека сите пропишани стандарди и оперативни процедури и правила биле доследно испочитувани?
И Јолевски нема ништо повеќе да каже освен што жали и ќе чекал законски измени за употреба на огнено оружје?
Значи вака ќе продолжат да не штитат АРМ и Министерството за одбрана?
По ваквото фрапирачко соопштение, без ни малку чувство на морална и политичка одговорност, да не говориме за професионалната, Зоран Јолевски треба веднаш да си поднесе неотповиклива оставка, велат од СДСМ.