СДСМ изготви измени и дополнувања на меморандумот за евроинтеграции предложен од страна на ВМРО-ДПМНЕ, кој е составен дел на мартовскиот договор.
Пратеникот Игор Ивановски од СДСМ денеска по состанокот на работната група за препораките од извештајот на ад-хок комисијата за 24 декември, изјави дека и покрај нивните забелешки на меморандумот во најкраток рок може да се организира и негово потпишување.
Министерот за надворешни работи Никола Попоски, пак, истакна дека меморандумот и исходот од работната група може земјава да ја врати во колосек.
– По однос на меморандумот не гледам ништо спорно и мислам дека кој било политички актер во РМ кој сака да придонесе за членство во ЕУ нема никаков изговор да не го стори веднаш. Се надевам дека и останатите неколку точки ќе можеме да ги реализираме за да имаме целосно позитивна слика во претстојниот октомвриски извештај на ЕК, изјави Попоски денеска на ФИНКИ.