СДСМ преку соопштение реагира на говорот на премиерот Христијан Мицкоски по повод Илинден, обвинувајќи го дека и на најголемиот државен празник продолжил со реторика што ги дели граѓаните.
Од партијата посочуваат дека во својот говор Мицкоски повикал на борба против „омразата, цинизмот и талогот што ја трујат Македонија“, оценувајќи дека под поимот „талог“ ги сместува сите што не се согласуваат со неговите политики.
„Сите што не мислат како него. Сите што ја разобличуваат неговата политика. Сите што бараат Европа, правда и одговорност“, наведуваат од СДСМ.
Во реакцијата се додава дека Мицкоски и претходно користел навредливи квалификации за граѓаните, како „талог на општеството“, „мочуриште“, „медиокритети“ и „лешинари“, а дека истиот речник повторно го употребил и од илинденската говорница.
Според СДСМ, наместо пораки за единство и иднината на државата, премиерот испратил пораки што продлабочуваат поделби.
„Ова не е патриотизам, ова е политичка омраза облечена во празничен говор. Мицкоски не може да биде премиер на сите граѓани додека народот го третира како ‘талог’“, се наведува во партиското соопштение.