Во договорот што го потпишаа четворицата политички лидери, јасно е дефиниран транзицискиот период кој треба да финишира со предвремени парламентарни избори во април 2016, изјави за Телма претседателот на СДСМ Зоран Заев, известува Телма.
– Во тоа што го ставивме на хартија, дефинирано е дека на 10 јуни партиите преземаат обврска да договорат организација на Влада која ќе подготви и спроведе избори, како и други квалитетни работи. Но, јас не можам да бидам среќен со тоа што е постигнато, иако имам големи причини за тоа, бидејќи ова е договор: земи се или остави се. Ако нема договор за преодна Влада, не важи ниту договорот за избор ниту за другите корективи, како што се поглавјата 23 и 24 – рече Заев.
Во преодната Влада нема место за Груевски, објаснува Заев.
– Не може врвот на криминалот и корупцијата, што ние го покажавме, го разголивме пред целата домашна и меѓународна јавност, тој е командант на проблемите, сега тој да биде решение на проблемите. Тоа е лажовно и така нема да успееме – вели лидерот на СДСМ.
Иако на 10 јуни во Брисел на Груевски и Заев им претстои разговор на најтешката тема, лидерот на СДСМ верува дека решение е можно. Инсистира на преодна Влада без Груевски и Заев, па дури и без политичари.