Опозициската СДСМ денеска оцени дека Владата создава излузија оти има легитимитет и упорно избегнува да се соочи со волјата на граѓаните на слободни и фер парламентарни избори.
Зоран Јовановски, потпретседател на СДСМ на прес-конференција, преку паралела на политичките кризи во Македонија и Бугарија, наведе дека во државава ситуацијата е посериозна, а проблемите на граѓаните уште поголеми.
Во Бугарија, посочи, Владата си поднесе оставка за покачување на струјата од 14 проценти, а во Македонија од доаѓањето на актуелната власт цената на струјата, на барање на ЕЛЕМ пораснала за 82 проценти, а цената на МЕПСО за дури 180 проценти и е укината и дневната евтина тарифа.
„Премиерот Бојко Борисов вчера поднесе оставка од функцијата со образложение дека не може да гледа парламент опкружен со полициски огради и да биде сведок на судири на полицијата со демонстрантите кои се противат на поскапувањето на струјата.
Тој изјави дека власта ја добил од народот и дека на народот му ја враќа.
За жал, во Македонија ситуацијата е посериозна, а проблемите на граѓаните уште поголеми.
Еве ги фактите за споредба.
Во Бугарија, владата си поднесе оставка за покачување на струјата од 14 %, а во Македонија со Груевски на власт, цената на струјата, на барање на ЕЛЕМ порасна за 82 %, а цената на МЕПСО за дури 180 % и згора на се’ е укината и дневната евтина тарифа.
Борисов меѓу другото поднесе оставка и затоа што полицијата се судри со демонстрантите“, рече Зоран Јовановски.
Според Јовановски, наспроти оставката на Борисов меѓу останатото и за судирот на полицијата со демонстрантите, во Македонија од Собранието насилно биле исфрлени новинари и опозициски пратеници.
„На „црниот понеделник“, режимот во Македонија не се судри само со демонстрантите на улица, туку со брутално полициско насилство ги отстрани новинарите и буквално ги исфрли опозициските пратеници од сред Собрание.
Да не заборавиме дека во Македонија има и политички затвореници, медиумски мрак, се случи Мартин Нешковски, овој режим едноставно секојдневно ги задушува граѓанските слободи и права, а притоа на народот му го цеди последниот денар од џебот.
И покрај тоа Никола Груевски се држи за фотељата и се обидува да создаде илузија дека неговата Влада има легитимитет и упорно избегнува да се соочи со волјата на граѓаните на слободни и фер парламентарни избори“, додаде Јовановски.
Порача дека формата на нивното политичко дејствување и пружање отпор е единствениот начин државата да излезе од длабоката политичка криза во која се наоѓа и да се придвижи во вистинска насока. Примарната цел на нивното движење било граѓаните да не учествуваат на локалните избори и со тоа да покажат дека власта нема легитимитет.
„Токму затоа нашата форма на политичко дејствување и пружањето на отпор е единствениот начин за земјата да излезе од длабоката политичка криза во која се наоѓа и да се придвижи во вистинска насока.
Примарната цел на нашето движење е граѓаните да не учествуваат на локалните избори и со тоа да му ја разбијат илузијата на Никола Груевски дека неговиот режим има легитимитет“, изјави Зоран Јовановски.