Неколку институции работат на подготовките на министерскиот самит на ОБСЕ кој следната недела ќе се одржува во Скопје. Ова го истакна министерот за внатрешни Спасовски, кој посочи дека МВР цела година се подготвува за овој настан.
Присуство имаат најавено повеќе од 70 странски делегации и преку илјада учесници на самитот. Министерот вели дека се работи за опсежна акција која треба да се спроведе од безбедносен аспект и за тоа целосно се подготвени сите служби.
„Очекувам дека се ќе помине во најдобар можен ред. Ова е важен самит. Имаме шанса да покажеме капацитет, демократски вредности. На завршување на самитот, сите држави од светот, да гледаат со уважување кон нас. Сметам дека на сите треба да ни биде чест. Апелирам до граѓаните да имаат трпение за време на одржување на самитот и да ги почитуваат наредбите на полициските службеници. Нема да има блокада на цел град, ама ќе има блокада на одредени улици по кои ќе се движат делегациите“, кажа Спасовски.
Инаку советот кој се одржува во Скопје на 30 ноември и 1 декември е 30. министерски совет на ОБСЕ.