Создавањето ексклузивна економска зона меѓу Грција и Албанија не е единствената причина за посетата на Венизелос на Тирана. На маса биле и други две прашања – Косово и Македонија.
Ова денеска го пишува грчкиот весник „Ризоспастис“, осврнувајќи се на посетата на грчкиот министер за надворешни работи на Албанија, истакнувајќи дека „патувањето било дел од стратешкиот процес за подобрување на геостратешката улога и позиција на Грција во регионот“.
Со оглед на тоа што во Македонија има големо албанско малцинство кое е застапено и во Владата, темата за ситуацијата во нашата земја била неизбежна во разговорите во Тирана, а со тоа и прашањето за името, за кое весникот коментира дека е „хроничен проблем“ меѓу Атина и Скопје.
Потсетувајќи дека „грчките власти досега имале средби со македонски Албанци од Владата во Скопје во врска со прашањето за името“, „Ризоспастис“ пишува дека „употребата на албанското малцинство во Македонија со цел да се промовира решение за прашањето за името само ги заострува постоечките противречности и антагонизми во регионот“.