Кандидатот за градоначалник на Прилеп од коалицијата на ВМРО-ДПМНЕ Марјан Ристески на денешната прес-конференција вети дека за една година и половина Прилеп ќе биде опфатен со гасифиикацијата.
– Прилеп за една година и половина ќе биде опфатен со гасификација и компаниите и домаќинствата ќе може да го користат овој природен енергенс. Изградена е делницата на гасоводот Штип-Неготино, а во наредниот период треба да продолжи делницата Неготино-Битола, преку Кавадарци и Прилеп во должина од 92 километри и во вредност од 37 милиони евра. Досега гасоводната цевка е поставена до селото Беловодица. Проектот започна со претходната влада на ВМРО-ДПМНЕ и треба да заврши до крајот на 2018 година. Истражувањето на пазарот беше направено преку Економскиот совет на Прилеп, Стопанската комора и преку Регионалната занаетчиска комора кои го видоа интересот од гасификацијата и своите потреби од нов енергенс, рече Ристески.
Според него, ова ќе биде значаен капитален проект за Прилеп, за домаќинствата и посебно, за развојот на економијата.
– Преку обезбедувањето поевтини енергенси и преку заштитата на животната средина, ќе се овозможи поголема конкурентност на прилепските компании и подобар квалитет на живеењето, изјави Ристески.
