Здружението на новинари на Македонија и нејзиниот претседател Насер Селмани денеска излегоа со срамна одбрана на платеникот на СДСМ Саше Ивановски Политико, се вели во денешната реакција од ВМРО-ДПМНЕ.
– Тие луѓе што го злоупотребуваат Саше Ивановски го гледаат во него тоа што целата јавност го гледа, но СДСМ, Сорос и одделни новинари се смеат и ликуваат кога ќе успеат да го набуцкаат од себе да го прави тоа што го прави. Тие не само што го толерираат, туку го стимулираат и оправдуваат неговото агресивно однесување. Веројатно и го плаќаат, стои во реакцијата.
Во реакцијата од ВМРО – ДПМНЕ се вели дека ЗНМ и Насер Селмани со ова практично наместо да ги штитат, се првите кои ги газат новинарските стандарди и охрабруваат рушење на слободата на говор и приватноста. Со оваа денешна реакција, се подвлекува, ЗНМ оправдува непрофесионално однесување.
– ВМРО-ДПМНЕ секогаш застапува ставови за професионалност во извршување на новинарската професија, но и ставови кои значат заштита на личниот интегритет и безбедноста на секој граѓанин, независно дали се работи за политичар, новинар, уметник, поет или друг граѓанин, се посочува во реакцијата од партијата.
Од ВМРО – ДПМНЕ потсетуваат дека од ЗНМ и Насер Селмани немаат ниту една единствена реакција на нападите, говорот на омраза, загрозувањето на приватноста, кои, стои во реакцијата, во континуитет ги прави Саше Политико.