АД Електрани на Македонија, согласно својата деловна политика, континуирано инвестира во нови енергетски проекти, модернизација и ревитализација на постојните капацитети, како и во подготвителни активности за изградба на нови капацитети, се вели во реакцијата од ЕЛЕМ, по повод денешната прес-конференција на СДСМ.
– Само во РЕК „Битола“, најголемиот енергетски капацитет во државата, последните неколку години било инвестирано во повеќе капитални проекти, а вредноста на вложените средства е најголема од изградбата на Комбинатот во 1975 година, велат од ЕЛЕМ.
– Извршена е модернизација и автоматизација на турбо агрегатите и генераторите на трите енергетски блока на термоелектраната, почната е модернизација на котлите во термоелектраната, отворени се два нови рудника, ПК Брод – Гнеотино и Подинската јагленова серија на ПК Суводол, засилени се производните капацитети со нова рударска опрема, роторни багери, багери дреглајни, одлагачи, а годинава заврши и монтажата на Главниот транспортен систем за јаглен од ПК Брод – Гнеотино до ПК Суводол во должина од 10 километри.
– Реализацијата на овие крупни инвестициски зафати неминовно доведе и до зголемување на обемот на работа во Комбинатот и потреба од отворање нови работни места. Со оглед на тоа што РЕК „Битола“ длабоко навлезе во четвртата деценија од постоењето, се наметна и потребата од промена на старосната структура на вработените, освежување на Комбинатот со ангажирање млад стручен кадар и замена на оние преку 500 работници на кои само во последните неколку години, по различни основи им престанал работниот однос – се вели во реакцијата.
