Во изминатите десет години разликата во поддршката која ја имаат ВМРО ДПМНЕ и СДСМ е околу 200.000 гласови и се должи на мудроста на граѓаните да препознаат понуда на проекти и просперитет од една страна и деструкција и афери од друга страна. Таа разлика ќе се потврди и на 5 јуни, неведува ВМРО-ДПМНЕ во пишана реакција на соопштението на СДСМ во врска со Избирачкиот список.
Според владејачката партија, СДСМ е во паника откако медиумите објавиле информации дека нивната теза за 150.000 непостоечки гласови, кои биле украдени е целосна лага и манипулација.
– СДСМ е во паника затоа што се покажа дека ситните корекции во избирачкиот список можеле да се направат и да се стигне за изборите кои требаше да се одржат на 24 април.
Единствената причина за одложувањето беше стравот на СДСМ од соочување со граѓаните. Затоа СДСМ упорно ја замајува јавноста со истите стари манипулации. За среќа оваа излитена и деструктивна политика на СДСМ е прочитана и истата ќе ја казнат сурово на 5 јуни, соопшти ВМРО-ДПМНЕ.
Партијата посочува дека СДСМ ги контролира двете најважни институции задолжени за спроведување на изборите, ДИК и МВР, и затоа, како што наведува, секој обид за пронаоѓање ефтино алиби не им поминува ниту кај нивните партиски членови.
– Чичаковски и Спасовски сега имаат директен увид на избирачкиот список и имаат целосна одговорност за кредибилитетот на истиот, вклучително и да ги расчистат сериозните индиции кои се појавуваат во медиумите, со цел што поскоро да има прочистен список. Изборите на 5 јуни и катастрофалниот јубилеен пораз на СДСМ само ќе потврдат дека досегашните избори не само што биле кредибилни, туку биле и реален сооднос на довербата која граѓаните им ја даваат на ВМРО-ДПМНЕ и СДСМ, стои во реакцијата на ВМРО-ДПМНЕ.